Alltaf að vinna í lottó.

14.1.2008 | 14:55

Alltaf að vinna í lottó.

Undanfarið hef ég fengið nokkra tölvupósta frá hinum ýmsu aðilum, þar sem mér er tilkynnt að netfangið mitt hafi verið dregið út og ég hljóti svo og svo mikið að launum. Einnig hef ég unnið í hinum og þessum lottóum töluverðar upphæðir síðustu vikur. Alveg þó án þess ég hafi spilað mér vitanlega með í neinu þeirra. Í fljótu bragði virðist mér sem ég hafi unnið um 4.508.000 bresk pund sem samsvara um 507.331.160 íslenskum krónum á gengi Seðlabankans í dag.

Þá má ekki gleyma tölvupóstinum sem ég fékk frá ekkju nokkurri í Fjarkasistan sem bað mig kurteislega að passa upp á að peningar látins eiginmanns hennar rynnu til góðrar og heittrúaðar múslimasamtaka. Hún gat ekki hugsað sér konu greyið að einhverjir villutrúarmenn kæmust yfir þetta fé og eftir því sem hún sagði þá virtust vera miklar líkur á því að það væri að gerast og áttu okkar viðskipti að fara fram með mikilli leynd. Ég átti að fá slatta að launum fyrir viðvikið. Í öllum tilvikum á ég að senda staðfestingu til baka að ég væri ég ásamt nokkrum upplýsingum um mig eins og til dæmis hjónabandsstöðu, starfsvettvang og bankareikning. Til hvers er ætlast til þess að maður gefi upp hjónabandsstöðu sína og starf? Ætli það hafi áhrif á greiðslu vinningsins ef maður er giftur karlmaður í starfi ríkissaksóknara eða lögreglustjóra, eða ógift einstæð og atvinnulaus móðir? Maður bara spyr sig.

Skil bara ekkert í því hvers vegna ég fæ ekki tölvupóst frá Íslenskri Getspá með tilkynningu um að ég hafi unnið í lottói á þeirra vegum. Ég spila þó með í því. Miðað við mína heppni í lottóum sem ég tek ekki þátt í er þó líklegt að hann komi bráðlega.

Kannski er galdurinn við að vinna fólginn í því að vita ekki af því að maður spili með.

Flokkur: Bloggar | Facebook

Athugasemdir

Mér finnst þessi mál lykta af skreið!

Mummi Guð, 14.1.2008 kl. 16:14

hey já kannski maður ætti þá að hætta að kaupa miða hjá HHÍ og þannig fara að vinna

Dísa Dóra, 14.1.2008 kl. 16:39

hmmmm,,,, já þú segir það

Margrét Össurardóttir (IP-tala skráð) 14.1.2008 kl. 17:24

Hefur Benjamín prins haft samband við þig?

Njáll (IP-tala skráð) 14.1.2008 kl. 17:40

Mummi. Finnur þú aldrei fnykinn sem gýs upp í hvert sinn sem ég opna tölvupóstinn minn?

Dísa Dóra. já ég held að málið sé að eiga ekki miða.

Njáll. Ekki Benjamín prins í eigin persónu en örugglega flestir hans ráðgjafar.

Fjóla Æ., 14.1.2008 kl. 18:07

Hehehe já ég er búin að vinna í svona "lottóum" undanfarið, er farin að blokka þetta bara í aðalemailinu mínu...trúgjörn...já sæll ekki alveg svona mikið

Ragnheiður , 14.1.2008 kl. 21:21

ég nú líka ofsa heppni á svona tölvupósta happdrætti. en Hhí hef ég aldrei unnið í þó ég hef verið í því í 2 ár. Hringdi einu sinni að kvarta, gaurinn bara hló að mér..