Ég var að spá...

...í því hvort að fólk sé almennt hjátrúarfullt. Ég þekki nefnilega fólk sem snýr við eða fer aðra leið ef að svartur köttur fer í veg fyrir það. Einnig þekki ég fólk sem trúir því að ef maður þvær sér ekki um augun upp úr blessuðu vatni að þá verði maður blindur. Einnig er fullt af fólki sem gengur ekki frá neinum samningum né hefur nýtt starf nema á fimmtudegi eða föstudegi og einnig eru margir sem láta sér nægja að hefja ekki nýtt verk eða gera nýja samninga á mánudegi . Mér hefur oft verið meinað að drekka ófrísk úr bolla sem misst hefur handfangið eða er með brot í barmi, vegna þess að þá yrði barnið mitt heyrnarlaust eða holgóma. Og svo má lengi telja. Hvað með þig? Ert þú hjátrúarfullur einstaklingur?

Veðurpirr

Ríkar stúlkur líkjast gullúrum, - kassinn er bestur.  Þetta spakmæli er í boði dagbókarinnar.

Það snjóar og snjóar. Er komin með leið á þessum snjó en get þó huggað mig við það að veðurspáin segir að bráðlega muni koma brjálað rok og rigning og allur snjórinn hverfur eins og dögg fyrir sólu. Í staðinn fer bara allt á flot og vatn flæðir um allt. Þá get ég bloggað pirringsblogg um það að ég þoli ekki þessa rigningu endalaust. Ég heppin. Mikið er nú gott að hafa alltaf eitthvað til að pirra sig yfir.

Þangað til næst elskið hvert annað, líka í pirringnum.

Minningarbrot

Var að fá smá upprifjun frá því að krakkarnir mínir voru litlir og get ekki að því gert að minningarnar vekja hjá mér hlátur.  Ein minningin er þegar unglingurinn minn kom og leitaði mikið að augunum sem ég hlaut að vera með í hnakkanum og komu í veg fyrir að hann gæti laumast framhjá mér.

Önnur minning er um prinsessuna sem oft hefur mikinn sannfæringarkraft.  Ég hef gjarnan sagt að það séu alltaf jól hjá mér og bendi á nafnið mitt því til sönnunar og hafði sú stutta auðvitað heyrt af því og ákvað að nýta sér það. Hún taldi því vinkonu sinni trú um að heima hjá okkur væri fullskreytt jólatré úti í bílskúr og ef okkur langaði að halda jól þá tækjum við bara jólatréð inn og héldum jól. Hún bauð meira segja vinkonu sinni að koma og halda með okkur ein jólin í júlí. Þetta komst upp þegar vinkonan vildi halda jól heima hjá sér og skildi bara ekkert í þvermóðsku móður sinnar því heima hjá mér væri þetta svona og hún vildi líka.

sæludagar

Nú eru algerir sæludagar að baki en þar er ég að tala um bollu og sprengidaginn. Bolludeginum er alltaf þjófstartað, líka hjá mér. Bakaði gommu af bollum á laugardaginn sem hreinlega hurfu eins og hendi er veifað. Nennti síðan ekki að baka á mánudag og keypti bara nokkrar bollur sem hurfu líka. Eldaði síðan saltkjöt og baunir í kvöld fyrir um það bil 100 manns þannig að afgangurinn var gífurlegur enda við bara fjögur við matarborðið. Man bara næst að elda ekki svona mikið. Je right.

Á morgun er skemmtilegur dagur. Öskudagur. Börnin út um allan bæ syngjandi, sæl og glöð með góðgæti í pokum. Reyndar líta þessi fallegu börn oftast ekki út sem þau fallegu börn þau eru heldur er kappsmálið að vera sem ógeðslegastur, hræðilegastur eða ógurlegastur. Unglingurinn minn bað mig um að handleggsbrjóta sig og setja sig síðan í gifs. Sem móðir sem gerir allt fyrir börnin sín, dreif ég mig auðvitað í að mölva á honum hendina og gifsaði.  Núna er gifsið að fullþorna upp við ofn á meðan stráksi sefur og verður fullþornað á morgun þegar hann verður handleggsbrotinn á ný. Prinsessan ætlar að vera spákona. Hugsa að ég reyni að fá hjá henni framtíðarspá, það er svo margt sem mig langar að vita um framtíðina.

 

Einn sveittur næst?

Eftir að hafa haft margréttað í gær ákvað ég að elda bara fisk í dag og bera hann fram með gommu af grænmeti. Held að næst þegar verði stungið upp á því að hafa bjúgu, sperla, bjúgur eða grjúpán í matinn að ég stingi upp á því að fara bara á Villa og fá sér einn sveittan. Síðan er á matseðlinum fyrir morgundaginn gamall og að sumra  mati ónýtur matur en vegna skólahreystis og bekkjarskemmtunar lítur allt út fyrir að maturinn fái að skemmast aðeins lengur eða fram á helgina. Annars finnst mér þessi svokallaði þorramatur góður, get reyndar lítið borðað hann núorðið en alltaf gaman að smakka smá. Þegar ég var að alast upp í sveitinni þá var alltaf besti maturinn þegar mamma ákvað að hafa snarl í matinn. Þá fór hún í súrtunnuna og fann til ýmisslegt góðgæti og bestar voru sviðalappirnar, spældi eða sauð egg og fann til eitthvað fleira og síðan var þetta borðað með rúgbrauði sem mamma bakar af hreinni snilld eða flatkökum sem mamma steikir líka. Reyndar er flest allt sem ég hef borðað sem mamma eldar gott enda er hún ótrúlega góður kokkur og vona ég að ég komist einhvern tímann með tærnar þar sem hún hefur hælana í eldhúsinu. Kannski hljómar þetta ekki eins jafnréttissinnað og ég en þar sem ég hef mikla ánægju af því að borða þá er gott að geta gert almennilegan mat svo ánægjan verði enn meiri.

Þangað til næst munið eftir ykkur sjálfum því það er auðvelt að týnast í erli dagsins. Knús.

Bjúgu eða bjúgur?

Gullkorn vikunnar í boði dagbókarinnar minnar er:   Þeir sem halda þrumandi ræðu, gæta þess ekki ætíð, hvar eldingunni slær niður.  

Annars voru undarlegar samræður á þessu heimili í kvöld. Umræðan var um hvað væri í kvöldmatinn og voru ekki allir á eitt sáttir um hvað væri í matinn. Mér var farið að finnast að ég væri að elda tvenns konar mat í einum potti. Málið var að sumir sögðu mig elda bjúgur á meðan aðrir töluðu um bjúgu. Á endanum var því tvíréttað, bjúgur með kartöflumús og bjúgu með kartöflumús, því enginn var tilbúinn til að viðurkenna að hinn gæti haft rétt fyrir sér.

Ég er enn sannfærð um að best sé að segja upp áskriftinni að stöð2 á mánudögum vegna þess að þar er á dagskrá allt kvöldið þátturinn "Látum fávíst fólk standa fyrir framan myndavél og gerum grín að því". Reyndar var ég svo heppin að þurfa ekki að horfa á þetta því það var verið að sýna frá fótboltaleik og aldrei held ég að ég hafi búist við því að ég myndi segja frá því að ég væri ánægð með að hafa stillt á fótboltaleik í sjónvarpi. Hef líka á tilfinningunni að þeir sem þekkja mig hafi heldur ekki átt von á því. Alltaf gaman að koma á óvart.

Þangað til næst bið ég ykkur að njóta góðra stunda með gleði í hjarta.

versti dagur ársins

Núna er Gullrassinn kominn í Rjóður þar sem hann ætlar að vera fram á föstudag. Þess vegna hugsaði ég mér að eiga notalegt kvöld við kertaljós og áhorf á sjónvarpið, einhverja spennþætti lúmsku dramagaman ívafi, EN á stöð 2 er komið að hinum sívinsæla niðurbrotsþætti american idol sería örugglega 10 og ekki nóg með að það sé verið að sýna 1 þátt heldur er allt kvöldið tekið í að sýna þessi ósköp. Held ég fari að ræða um uppsögn á stöð 2. Alla vega á mánudögum. Er að verða komin að sömu niðurstöðu og vísindamaðurinn sem fann það út að dagurinn í dag sé versti dagur ársins. Annars er allt fínt að frétta héðan þrátt fyrir allt.

Munið að passa vel upp á hvert annað og njótið þess að vera til, líka á verstu dögunum.

Stundum...

 

Stundum ....

þegar þú grætur ... sér enginn tárin.

Stundum ....

þegar þú ert sár ... sér enginn sársaukann.

Stundum ....

þegar þú ert áhyggjufullur ... sér enginn álagið.

 

Stundum ....

þegar þú ert glaður ... sér enginn brosið. 

Svo prumparðu einu sinni ....

og það virðast ALLIR vita af því!!

 

Alltaf að vinna í lottó.

Undanfarið hef ég fengið nokkra tölvupósta frá hinum ýmsu aðilum, þar sem mér er tilkynnt að netfangið mitt hafi verið dregið út og ég hljóti svo og svo mikið að launum. Einnig hef ég unnið í hinum og þessum lottóum töluverðar upphæðir síðustu vikur. Alveg þó án þess ég hafi spilað mér vitanlega með í neinu þeirra.  Í fljótu bragði virðist mér sem ég hafi unnið um 4.508.000 bresk pund sem samsvara um 507.331.160 íslenskum krónum á gengi Seðlabankans í dag.

Þá má ekki gleyma tölvupóstinum sem ég fékk frá ekkju nokkurri í Fjarkasistan sem bað mig kurteislega að passa upp á að peningar látins eiginmanns hennar rynnu til góðrar og heittrúaðar múslimasamtaka. Hún gat ekki hugsað sér konu greyið að einhverjir villutrúarmenn kæmust yfir þetta fé og eftir því sem hún sagði þá virtust vera miklar líkur á því að það væri að gerast og áttu okkar viðskipti að fara fram með mikilli leynd.  Ég átti að fá slatta að launum fyrir viðvikið. Í öllum tilvikum á ég að senda staðfestingu til baka að ég væri ég ásamt nokkrum upplýsingum um mig eins og til dæmis hjónabandsstöðu, starfsvettvang og bankareikning.  Til hvers er ætlast til þess að maður gefi upp hjónabandsstöðu sína og starf? Ætli það hafi áhrif á greiðslu vinningsins ef maður er giftur karlmaður í starfi ríkissaksóknara eða lögreglustjóra, eða ógift einstæð og atvinnulaus móðir? Maður bara spyr sig.

Skil bara ekkert í því hvers vegna ég fæ ekki tölvupóst frá Íslenskri Getspá með tilkynningu um að ég hafi unnið í lottói á þeirra vegum. Ég spila þó með í því. Miðað við mína heppni í lottóum sem ég tek ekki þátt í er þó líklegt að hann komi bráðlega.

Kannski er galdurinn við að vinna fólginn í því  að vita ekki af því að maður spili með.

Litlir kassar

Búin að pakka jólunum niður aftur en á eftir að setja alla kassana út í bílskúr þar sem þeir ætla að búa þangað til þeim verður boðið inn á ný. Þarf bara smá aðstoð við það, þar sem ég er svo stutt í annan endann og var svo örlát að lána einhverjum með minnimáttarkennd hinn endann og get ómögulega munað hver það var.

Síðustu daga hafa verið fínir. Við hjónaleysin héldum upp á afmæli unnustans með smá partýi sem tókst það vel að hann er farinn að hlakka til að verða fimmtugur. Ekki veit ég hvernig á að túlka það. Gullrassinn var í Rjóðri á meðan og var síðan boðið að vera lengur sem hann þáði og kom því ekki heim fyrr en á miðvikudag.  Á þeim tíma hamaðist ég við að gera sem minnst. Fór reyndar í bæinn á þriðjudag og eyddi jólagjöf sem ég fékk. Það var fínt, ég þarf þá ekki að hafa áhyggjur af henni meir. Gærdeginum eyddi ég síðan í símanum við að redda málunum vegna áramótanna. Alveg merkilegt hvað margt verður stopp bara vegna þess að það kemur nýtt ár. Held að flestir hlutir séu komnir á gott ról og ættu að vera orðnir frágengnir í næstu viku.

Farin í bili og þangað til næst knúsist svolítið og brosið. Þá verður allt betra.