Þoka

Síðustu dagar hafa liðið hjá í þoku. Ég nuddaði enninu mínu í síðasta sinn við enni litla Gullrassins míns og kyssti hann bless. Það er svo skrítið að að hugsa til þess að ég sjái hann aldrei framar. En ég á minningarnar og myndirnar til að hugga mig við.

Útförin var mjög falleg og friðsæl. Frændur mínir sungu svo fallega til litla drengsins okkar. Það voru hræðilega þung sporin á etir litlu kistunni út kirkjugólfið og síðan að gröfinni.

Við ákváðum að hafa erfidrykkju á eftir athöfninni til að geta á einhvern hátt þakkað öllum þeim sem hafa stutt okkur í gegnum tíðina. Bæði fjölskylda og vinir og einnig þeim sem hafa verið á bak við tjöldin en gefið okkur samt svo mikið. Það var ánægjulegt að sjá hve margir komu. Okkur datt í hug að láta mynd af Hugin á flest borðin í erfidrykkjunni og var það svo hlýlegt og gott að geta séð fallega brosið hans hvert sem litið var.

Ætla að hætta núna og bið ykkur þangað til næst að njóta augnabliksins.

Athugasemdir

[Ragnheiður , 5.4.2008 kl. 12:21]

Elsku Fjóla, ég hef grun um að dofinn sé leið líkamans til að lifa áfallið af, áfall sem er ekki á mannlegu valdi að lifa af. Samt mun maður gera það en ekkert verður nokkurn tímann eins.

Yndisleg hugmynd að setja myndirnar af Huginn á borðin.

Kærleikskveðja elsku Fjóla mín, kær kveðja til Mumma og barnanna ykkar

[Guðríður Haraldsdóttir, 5.4.2008 kl. 16:43]

Það var flott hjá ykkur að hafa mynd af litla kút á öllum borðum í erfidrykkjunni og líka hreinlega það að halda erfidrykkju. Ég man hvað mér þótti gott að enda erfiðan jarðarfarardag pabba á því að hitta vini og ættingja og spjalla við þá, það bjargaði sálartetrinu alveg þann daginn. Risafaðmlag til þín, Mumma og barnanna!

[Áslaug Helga Hálfdánardóttir, 5.4.2008 kl. 18:42]

Elsku Fjóla mín, stórt knús til þín frá mér...

[Dísa Dóra, 5.4.2008 kl. 21:02]

Elsku Fjóla ég sendi þér stórt knús og hlýjar hugsanir   Megi allar góðar vættir vaka yfir ykkur og halda í höndina á ykkur á þessum erfiðu tímum

[Margrét Össurardóttir (IP-tala skráð) 5.4.2008 kl. 21:38]

Stórt huggunarfaðmlag frá mér til ykkar allra, þið eruð hetjur öll sömul. Líkt og Ragga segir þá er dofin örugglega leið kroppsins til að milda áfallið. Frábær hugmynd hjá ykkur að setja mynd af honum á borðin.

Enn og aftur RISA faðmlag til ykkar allra.

[Halla Rut , 6.4.2008 kl. 23:04]

Til ykkar frá mér.

[Brynja skordal, 8.4.2008 kl. 01:11]