Litlir kassar

Búin að pakka jólunum niður aftur en á eftir að setja alla kassana út í bílskúr þar sem þeir ætla að búa þangað til þeim verður boðið inn á ný. Þarf bara smá aðstoð við það, þar sem ég er svo stutt í annan endann og var svo örlát að lána einhverjum með minnimáttarkennd hinn endann og get ómögulega munað hver það var.

Síðustu daga hafa verið fínir. Við hjónaleysin héldum upp á afmæli unnustans með smá partýi sem tókst það vel að hann er farinn að hlakka til að verða fimmtugur. Ekki veit ég hvernig á að túlka það. Gullrassinn var í Rjóðri á meðan og var síðan boðið að vera lengur sem hann þáði og kom því ekki heim fyrr en á miðvikudag.  Á þeim tíma hamaðist ég við að gera sem minnst. Fór reyndar í bæinn á þriðjudag og eyddi jólagjöf sem ég fékk. Það var fínt, ég þarf þá ekki að hafa áhyggjur af henni meir. Gærdeginum eyddi ég síðan í símanum við að redda málunum vegna áramótanna. Alveg merkilegt hvað margt verður stopp bara vegna þess að það kemur nýtt ár. Held að flestir hlutir séu komnir á gott ról og ættu að vera orðnir frágengnir í næstu viku.

Farin í bili og þangað til næst knúsist svolítið og brosið. Þá verður allt betra.

Athugasemdir

[Ólafur fannberg, 11.1.2008 kl. 16:11]

er einnig búinn að pakka jólunum niður ásamt allri búslóðinni

[Fríða K (IP-tala skráð) 12.1.2008 kl. 15:09]

Svo að afmælið hefur tekist vel???? var hann ekki ánægður með alla pakkana sína? Maður fær víst svo mikið af pökkum á svona stórafmælum.  hehehehehe

[Njáll (IP-tala skráð) 13.1.2008 kl. 10:55]

Þegar við vorum að tala um að fara ganga frá jólaskrautinu hérna heima þá fór Árni Freyr að pæla í því af hverju við þyrftum að ganga frá því, af því að jólin kæmi alltaf aftur.

Takk fyrir kaffið núna síðast, það urðu allavegana enginn afföll á  bollum núna, takk fyrir mig.

Bið að heilsa