Ég setti mér markmið en strengdi ekki áramótaheit en samt...

Gleðilegt ár, kæru vinir. Vona innilega að það komi til með að færa ykkur, og mér líka, gæfu og gjörvileika á alla mögulega vegu.

Nú er víst tíminn til að strengja áramótaheit, segja frá þeim og síðan eftir um það bil 2 vikur að brjóta þessi umtöluðu áramótaheit sín.  Ég strengdi engin áramótaheit um þessi áramót þannig að ég þarf ekki að brjóta neitt eftir 2 vikur. Reyndar datt mér í hug á jóladag að það gæti verið sniðugt að setja sér smá markmið og hef ég lagt mig alla fram við það síðan að vinna að þessu háleita markmiði mínu. Hversu lengi mér tekst að standa við markmiðið er ekki gott að segja en ef ég þekki mig rétt þá endist það ekki lengi, lítur meira að segja þannig út núna að úthaldi sé lokið.

Þá er að upplýsa um hið umtalaða markmið mitt. Það er að halda kjörþyngd amk. í nokkrar vikur í röð . Hef unnið eins og áður segir markvisst að því síðan á jóladag með allskonar aðgerðum sem felast aðallega í því að fá mér rjóma útí kaffið, borða konfekt í kílóavís, klára allt laufabrauðið alein og borða allan annan mat í miklu óhófi .

Ég svo sem geri mér alveg grein fyrir því að þetta er dæmt til að mistakast, því mér finnst nammi yfirleitt ekki gott, rjómi fer ekki vel í mig, laufabrauð á bara að vera í boði á jólunum og matur í óhófi fer víst heldur ekki vel í mig. Þannig að ég verð að viðurkenna vanmátt minn í aukakílóagerð og fáránlegra markmiðasetninga og skella mér bara í sund eða göngutúr já eða út að hjóla á nýja fína ofurbláa hjólhestinum mínum. Er ekki alltaf sagt að vöðvar séu þyngri en fita?

Þangað til næst vona ég að ykkur gangi betur en mér að halda áramótaheitin eða önnur markmið sem þið setjið ykkur. Knúsist samt sem áður sem aldrei fyrr, það er bara svooo gott.

Athugasemdir

[Anna Gísladóttir, 2.1.2008 kl. 12:13]

Gleðilegt ár til þín og þinna

[Áslaug Helga Hálfdánardóttir, 2.1.2008 kl. 12:24]

Gleðilegt ár Fjóla mín.. bara að ég gæti lánað þér nokkur af mínum kílóum!

[Halla Rut , 2.1.2008 kl. 12:47]

Sumum er bara eðlislegt að vera grannir. Þeir líða fyrir alla "anorexiu" umræðuna.  

[Fríða K (IP-tala skráð) 2.1.2008 kl. 14:39]

Gleðilegt ár

[Rannveig Lena Gísladóttir, 2.1.2008 kl. 20:10]

Gleðilegt ár Fjóla til þín og fjölskyldunnar.

Það væri nú fínt að geta deilt á milli okkar mínum hæfileikum í aukakílóaframleiðslu.  Ég hef nefnilega næga hæfileika á því sviði

[Mummi Guð, 2.1.2008 kl. 20:24]

Ég held að Fjóla þurfi ekki að leita langt til að finna aukakíló!!

[mamma (IP-tala skráð) 2.1.2008 kl. 21:14]

Gleðilegt ár elskan . Vertu bara eins og þér er einni lagið , lítil grönn og snaggaraleg þannig þekki eg þig . Annars er meðalviktin á heimilinu ekki svo slæm..............

Bestu kveðjur mútta og dótla

[Gunnar Helgi Eysteinsson, 2.1.2008 kl. 23:55]