Bloggfærslur mánaðarins, febrúar 2008

Vikan í stuði

Hamingjan er eins og ilmvatn, sem þú getur ekki sett á aðra án þess að nokkrir dropar loði við þig - þetta er spakmæli vikunnar í boði dagbókarinnar og að vanda er mikið til í því.

Vikan er búin að vera nokkuð annasöm. Gullrassinn er í Rjóðrinu og unir sér einstaklega vel. Fékk símtal frá þeim þar sem mér var tjáð að þær hefðu aldrei haft hann eins hressan og kátan eins og núna þessa dagana. Honum hefur reyndar liðið mjög vel síðan um árshátíðarhelgina og það skilar sér í auknum krafti sem aftur skilar sér í meiri getu til að gera alla hluti. Hann meira að segja gat setið aleinn í dálitla stund um daginn í fyrsta sinn.

Prinsessan vaknaði á mánudagsmorgun með hálsríg dauðans og var um kvöldið orðin stokkbólgin þannig að ég stökk með hana til læknis. Meðferð: Bólgueyðandi og nudd. Er mun skárri í dag en samt ekki það góð að hún treysti sér til að spila fótbolta. Fórum samt i bæinn á þriðjudagskvöldið þar sem við áttum flotta fjölskyldusamveru með stóru börnunum okkar í Keiluhöllinni. Ég komst að því að það er miklu mun auðveldara að spila Pool í tölvunni heldur en með kjuða. En ef ég æfi mig þá gæti ég kannski orðið nokkuð góð eftir svona 10 - 15 ár.

Unglingurinn lifði sig rösklega inn í sokkabolta í leikfimi í gær. Svo mikið að honum datt í hug að sparka gólfinu í markið. Það þýddi slit á naglabandi og gríðarlega mikla blæðingu. Fór og hitti lækninn sem setti stóran plástur á bágtið. Er núna hoppandi á hækjum alveg að drepast í fætinum og talar um að honum líði eins og hann sé með hjartað í tánni sem og  brotið bein. Það getur svo sem alveg verið. Hann græddi þó það að fá frí í skólanum í dag enda illfært á hækjum utanhúss þessa dagana.

Þangað til næst, skvettið ilmvatni hamingjunnar á náungann og uppskerið eigin hamingju.


Stopp í eitt andartak

Það að nema staðar andartak stöku sinnum er oft eina leiðin til að vera fær um að halda áfram. Þetta spakmæli er í boði dagbókarinnar þessa vikuna. Fer einhver eftir þessu nú á dögum?

Loksins loksins er ég að fá vinnu mína metna að verðleikum. Kannski ekki miklum verðleikum en verðleikum samt. Hvaða vinnu? Ég sem er heima allan daginn og geri ekki neitt. Ja nema kannski að hugsa um litla Gullrassinn minn allan sólarhringinn sem er misauðvelt. Suma daga er það meira að segja mjög erfitt en þetta er það sem ég vel að gera.

Fór sem sagt í gær og sótti um að fá hinar nýju greiðslur sem foreldrar langveikra barna eiga rétt á. Þessar greiðslur munu koma til með að skipta öllu máli fyrir margar langveikar fjölskyldur því ég tel að í sumum tilfellum eru þessar greiðslur, þótt ekki háar séu, það sem gerir foreldrum kleift að hafa veika barnið sitt heima hjá sér í stað þess að verða að setja það á stofnun. Því sannarlega þá verða allir að borða, eiga heima einhvers staðar og föt til að klæðast. Á Íslandi er nær nauðsynlegt að hafa 2 fyrirvinnur til að geta lifað. Langveikar fjölskyldur hafa ekki möguleika á nema kannski 1 fyrirvinnu og því miður er það frekar algengt að það sé engin fyrirvinna. Það eru ótrúlega margir einstæðir langveikir foreldrar í landinu. Samt er það líka vel skiljanlegt því álagið sem fylgir því að eiga alvarlega veikt barn ásamt gríðarlegum fjárhagsáhyggjum og mörgum öðrum erfiðum þáttum sem fylgja gjarnan veikindum barnsins er ómannlegt.

Þangað til næst, munum að heilbrigt barn er ekki svo sjálfsagt.


Óseðjandi?

Kannski maður hendi hér inn nokkrum orðum. Helgin er búin að vera stórfín. Fór á árhátíð með unnustanum í Bláa Lónið. Hin besta skemmtun. Dásamlegur matur. Hefði alveg viljað fá meiri mat samt, ekki það að maturinn væri ekki vel útilátinn, nei þvert á móti. Mér finnst bara svo gaman að borða góðan mat að ég get vel dundað mér við það í nokkra klukkutíma, eins og þeir sem þekkja mig vita vel. En það var víst ekki í boði en í staðinn var boðið upp á Pál Óskar og ekki var hann síðri en maturinn og líkt og hann, varði ánægjan einnig í of skamman tíma. Þrátt fyrir að auglýst hefði verið að hvítt væri liturinn sá ég ekki nema 2 konur hvítklæddar og einungis 1 karlmann á hátíðinni. Reyndar voru nokkrar konur með hvítt í fötunum sínum og karlarnir gjarnan í hvítum skyrtum eða með hvít bindi. Flestir voru bara svartklæddir eins og venjulega.

Well mæ pípúl þrátt fyrir nærri 10 tíma svefn er eins og ég hafi lítið sofið og ætla því að fara að skríða í ból og heyri bara í ykkur á morgun. Góða nótt og njótið hvíldar og svefns.


Ljótur kall

Vaknaði allt of seint í morgun en náði þó að koma börnunum út úr húsi fyrir 8 svo þau náðu strætó í skólann. Í nesti tóku þau með sér skilaboð um að gæta sín á ljótum köllum sem narra börn upp í bílana sína til að beita þau síðan kynferðislegu ofbeldi. Aðvörun hafði verið birt á vef Víkurfrétta þannig að þau fengu að sjá mynd af þurfandi manni enda hefur hann fengið að dúsa á bak við lás og slá undanfarið en er nú nýlaus og gr.... Honum þótti skynsamlegt að kíkja hingað suður til að skoða börnin. Börnin fengu reyndar líka nesti með sér sem til að borða, þóttist góð að muna eftir því vegna mikillar gleði hjá mér vegna fréttanna um komu ljóta kallsins í bæinn. Eitt sem ég furða mig er að á vef Víkurfrétta er sagt að börnum í Myllubakkaskóla hafi verið sagt frá manninum og gefnar ýmsar leiðbeiningar um hvernig gott sé að varast svona menn. Mín börn eru í 5. og 9. bekk og þau segjast ekki hafa fengið neina vitneskju um kauða frá hendi skólans.

Verð að hætta í bili því ég er á fullu að skrifa ritgerð fyrir unglinginn um, ykkur getur ekki dottið það í hug, en engu að síður er hún um fótboltamanninn Cesc Fábregas. Blush og ég ætla ekki að muna neitt um dúddann eftir að ég er búin að skrifa


Hún á afmæli

Fyrir 11 árum varð ég þeirrar gæfu aðnjótandi að fæða í þennan heim mikla prinsessu. Þar er á ferð sterkur persónuleiki sem veit hvað hún vill. Hún er hvers manns hugljúfi með gleði sinni og húmor. Yljar með hugljúfum söng allan daginn, alla daga. Til hamingju með afmælið elsku Ásdís Rán InLove.

Ásdís Rán

Ásdís Rán


Vangavelta

Betra er að spyrja til vegar en villast  segir spakmæli dagbókarinnar að þessu sinni.

Hef tekið eftir því að sumum finnst mjög erfitt að spyrja til vegar ef þeir eru ekki vissir um hvaða leið sé sú besta til þess áfangastaðar þeir eru á leið til. Hvers vegna er það svona erfitt? Er það vegna stoltsins, ég get þetta sjálfur hugsunin, eða er það þrjóskan, ég skal ekki gefast upp þetta hlýtur að virka einhvern tímann, eða er maður minni maður af því að leita sér aðstoðar einhvers sem veit?


Ég var að spá...

...í því hvort að fólk sé almennt hjátrúarfullt. Ég þekki nefnilega fólk sem snýr við eða fer aðra leið ef að svartur köttur fer í veg fyrir það. Einnig þekki ég fólk sem trúir því að ef maður þvær sér ekki um augun upp úr blessuðu vatni að þá verði maður blindur. Einnig er fullt af fólki sem gengur ekki frá neinum samningum né hefur nýtt starf nema á fimmtudegi eða föstudegi og einnig eru margir sem láta sér nægja að hefja ekki nýtt verk eða gera nýja samninga á mánudegi . Mér hefur oft verið meinað að drekka ófrísk úr bolla sem misst hefur handfangið eða er með brot í barmi, vegna þess að þá yrði barnið mitt heyrnarlaust eða holgóma. Og svo má lengi telja. Hvað með þig? Ert þú hjátrúarfullur einstaklingur?


Veðurpirr

Ríkar stúlkur líkjast gullúrum, - kassinn er bestur.  Þetta spakmæli er í boði dagbókarinnar.

Það snjóar og snjóar. Er komin með leið á þessum snjó en get þó huggað mig við það að veðurspáin segir að bráðlega muni koma brjálað rok og rigning og allur snjórinn hverfur eins og dögg fyrir sólu. Í staðinn fer bara allt á flot og vatn flæðir um allt. Þá get ég bloggað pirringsblogg um það að ég þoli ekki þessa rigningu endalaust. Ég heppin. Mikið er nú gott að hafa alltaf eitthvað til að pirra sig yfir.

Þangað til næst elskið hvert annað, líka í pirringnum.


Minningarbrot

Var að fá smá upprifjun frá því að krakkarnir mínir voru litlir og get ekki að því gert að minningarnar vekja hjá mér hlátur.  Ein minningin er þegar unglingurinn minn kom og leitaði mikið að augunum sem ég hlaut að vera með í hnakkanum og komu í veg fyrir að hann gæti laumast framhjá mér.

Önnur minning er um prinsessuna sem oft hefur mikinn sannfæringarkraft.  Ég hef gjarnan sagt að það séu alltaf jól hjá mér og bendi á nafnið mitt því til sönnunar og hafði sú stutta auðvitað heyrt af því og ákvað að nýta sér það. Hún taldi því vinkonu sinni trú um að heima hjá okkur væri fullskreytt jólatré úti í bílskúr og ef okkur langaði að halda jól þá tækjum við bara jólatréð inn og héldum jól. Hún bauð meira segja vinkonu sinni að koma og halda með okkur ein jólin í júlí. Þetta komst upp þegar vinkonan vildi halda jól heima hjá sér og skildi bara ekkert í þvermóðsku móður sinnar því heima hjá mér væri þetta svona og hún vildi líka.


sæludagar

Nú eru algerir sæludagar að baki en þar er ég að tala um bollu og sprengidaginn. Bolludeginum er alltaf þjófstartað, líka hjá mér. Bakaði gommu af bollum á laugardaginn sem hreinlega hurfu eins og hendi er veifað. Nennti síðan ekki að baka á mánudag og keypti bara nokkrar bollur sem hurfu líka. Eldaði síðan saltkjöt og baunir í kvöld fyrir um það bil 100 manns þannig að afgangurinn var gífurlegur enda við bara fjögur við matarborðið. Man bara næst að elda ekki svona mikið. Je right.

Á morgun er skemmtilegur dagur. Öskudagur. Börnin út um allan bæ syngjandi, sæl og glöð með góðgæti í pokum. Reyndar líta þessi fallegu börn oftast ekki út sem þau fallegu börn þau eru heldur er kappsmálið að vera sem ógeðslegastur, hræðilegastur eða ógurlegastur. Unglingurinn minn bað mig um að handleggsbrjóta sig og setja sig síðan í gifs. Sem móðir sem gerir allt fyrir börnin sín, dreif ég mig auðvitað í að mölva á honum hendina og gifsaði.  Núna er gifsið að fullþorna upp við ofn á meðan stráksi sefur og verður fullþornað á morgun þegar hann verður handleggsbrotinn á ný. Prinsessan ætlar að vera spákona. Hugsa að ég reyni að fá hjá henni framtíðarspá, það er svo margt sem mig langar að vita um framtíðina.

 


Um bloggið

Þegar kviknar á deginum

Höfundur

Fjóla Æ.
Fjóla Æ.

Lífið er stundum erfitt en í samanburði við hvað?

Bloggarar

Topplistinn

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (29.3.): 0
  • Sl. sólarhring:
  • Sl. viku:
  • Frá upphafi: 0

Annað

  • Innlit í dag: 0
  • Innlit sl. viku:
  • Gestir í dag: 0
  • IP-tölur í dag: 0

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband