Nenni ekki

Sit hérna fyrir framan tölvuna á algjörum bömmer. Er um það bil að látast úr leti. Nenni ekki að baða Huginn sem liggur á gólfinu og hlær við Panther sem er reyndar fjólublái frílinn í einhverri Disney mynd sem ég man alls ekki hvað heitir og nenni ekki að muna. Alveg merkilega fyndinn fríll.  Nenni ekki að fara út og gera eitthvað í þessum blessaða palli mínum sem er farinn að öskra svo hátt á mig að verða kláraður að nágrannarnir eru farnir að kvarta undan óhljóðunum í honum. Nenni ekki að fara sjálf í bað þrátt fyrir að vera orðin svo skítug og illa lyktandi að ef ég væri buxur þá stæði ég sjálf. Nenni alls ekki að hugsa um hvernig í ósköpunum ég eigi að koma öllum farangrinum og börnunum í minn stóra bíl til að komast í sumarbústað. Einhvernveginn er sú hugsun samt alltaf að trufla mig. Ætti kannski að leggja mig og bíða eftir því að hugsunin líði frá. Nenni því ekki heldur. Ja, reyndar get ég það ekki. Verð að passa gullrassinn minn, baða hann og mig svo minn heittelskaði unnusti flýji ekki þegar hann kemur heim frá því að safna fyrir saltinu út á grautinn minn. Ég er eins og hundurinn, svínið og kötturinn sögunni um "litlu gulu hænuna" sem alltaf sögðu "ekki ég" og þar sem það er enginn annar sem getur núna verið litla gula hænan þá verð ég að vera hún líka og segja "það vil ég" og með þeim orðum minni ég á nauðsyn þess að elska náungann og er farin að blása lífi í næstum látna mig, fæ mér ópal og dríf í að gera flesta þá hluti sem ég NENNI alls ekki að gera.

Dagurinn í dag

Ég fór í gær í heimsókn á leikskólann "minn" til að skoða loksins allar breytingarnar sem hafa verið gerðar á honum og auðvitað líka til að hitta gellurnar sem vinna þarna. Margar "gamlar" vinkonur hættar og enn aðrar að fara að hætta. En hitti samt margar vinkonur þarna. Mér fannst mjög skemmtilegt að komast loksins í heimsókn en ég hef ekki getað farið vegna Hugins því eins og hefur verið þá er leikskóli frekar hættulegur staður fyrir litla gullrassinn minn. Reyndar var eitt sem skyggði á ánægjuna en það var er ég hitti eina konu sem sagði svolítið sláandi og illa ígrundað við mig. Mér varð eiginlega svo um að ég gat ekki svarað henni og ég hef heldur ekki getað rætt þessi orð við neinn. En mér líður illa yfir þessum orðum og þykir leitt að hafa ekki getað svarað konunni því það hefði kannski vakið hana til smá umhugsunar um hversu særandi þessi orð voru. Ég hef alltof oft sagt eitthvað sjálf sem er illa ígrundað og alls ekki fallegt fyrir áheyrandann án þess að meina í raun neitt með því en sagt samt án þess að hugsa. Mér þykir það mjög leitt og biðst afsökunar á því að hafa sært einhvern. Vegna lífsreynslu minnar undanfarin ár hef ég lært að dagurinn í dag er mikilvægasti dagur lífs míns og ætla ég því að reyna að hætta að hugsa um sársauka gærdagsins og líta björtum augum til dagsins í dag því hann er hreint ágætur.

Í dag er rigning, í gær var líka rigning. Bráðum fer fólk að kvarta undan rigninunni og tala um að það sé komið nóg af henni og sumarið sé búið. Mér finnst fyndið hvernig þetta er, sól í margar vikur og allir farnir að tala um hversu nauðsynlega þyrfti að rigna og nú rignir og þá er það ekki nógu gott. Ég er ekkert skárri í þessum kveinstöfum. Mín vegna mætti koma sól á morgun og vera næstu vikur með hlýindum svona fram að jólum.

Núna er baðið hans Hugins tilbúið og við ætlum því að fara og njóta þess að vera í baði, eða sko Huginn í baði og ég að baða hann, svo ég minni ykkur á að lokum eftir að elska hvert annað, líka í rigningunni.

Frábær helgi

Það er kominn mánudagur eftir óvenjulega helgi. Hún var ekkert óvenjuleg fyrir venjulegt fólk en mjög óvenjuleg fyrir mig og Mummann minn. Við vorum tvö ein heima og fórum meira að segja upp í Borgarfjörð í heimsókn til hennar systur minnar. Við gistum í sveitinni og er þetta allt mjög sérstakt fyrir okkur undanfarin misseri. Man ekki hvenær ég svaf ekki síðast heima hjá mér fyrir utan spítalann og Rjóðrið. Sem sagt helgin var frábær og ég mun lifa slatta lengi á henni.  Stelpurnar skelltu sér norður með bróður mínum og eyddu helginni í dekri hjá ömmu sinni og afa þeim finnst það alltaf svo frábært. Huginn er enn þá í Rjóðrinu en við erum að fara núna á eftir að sækja hann. Það verður gott að fá hann heim aftur.  Annars verð ég að þakka sveitafólkinu mínu kærlega fyrir frábæra helgi.

Pallurinn minn er á blússandi ferð og með þessu áframhaldi verður hann tilbúinn fyrir Ljósanótt. Alla vega er Mumminn búinn að bjóða fólki í pottinn þá helgi þannig að við erum í vondum málum ef það klikkar. Held samt að það klikki ekki. Er nefnilega að hamast við að setja bönd yfir dregarana og þá er bara að setja klæðninguna yfir og og og. Sko eins og heyrist þá er hann alveg að verða tilbúinn.

Ætla að hætta að bulla í bili og þangað til næst verðið þið að muna eftir að elska hvert annað.

Raus

Langar til að henda inn einu bloggi um það sem hefur verið að gerast undanfarið. Guðjón kom heim á sunnudaginn til að fara með okkur í tívolí. Það var góðgerðardagur Smáralindar og þangað er félögum í hinum og þessum félögum boðið. Við fórum sem sagt á mánudaginn í tívolí öll saman og skemmtum okkur vel í yndislegu veðri. Gaman að því hversu vel Huginn nýtur sín utandyra. Hann var alveg sáttur allan þennan tíma sem við vorum þarna en það voru rúmir tveir tímar. Síðan skelltum við okkur á KFC og borðuðum saman. Á þriðjudaginn steyptum við loksins undirstöðurnar fyrir þennan blessaða pall okkar og nú er hægt að fara að setja bitana á og síðan klæðninguna. En alveg nýtt. Við höfum engan tíma fyrir þetta fyrr en á laugardag og gerist því ekki neitt amk. þangað til.

Ásdís æfir fótboltann sinn af miklum móð og spilar leiki bæði með stelpum og strákum þess á milli. Hún fór með stelpunum um daginn inn í Reykjavík að spila við Víking og kom heim án takkaskónna sinna. Við leituðum um allt og allir möguleikar útilokaðir og ekki fundust skórnir, Ásdís var farin að halda að hún hefði gleymt þeim fyrir utan húsið á Iðavöllum og einhver hefði tekið þá. Viku seinna fóru meistarflokksstelpurnar í leik og þegar þær voru farnar úr rútunni fór þjálfarinn yfir hana til að athuga hvort eitthvað hefði gleymst. Viti menn þá voru skórnir þar. Búnir að vera í viku í rútunni og bæði þjálfarinn og starfsfólk SBK búin að fara oft yfir hana. Ótrúlega merkilegt. Allavega var stelpan himinsæl með að fá skóna sína aftur.

Guðjón fór aftur í gær. Verður hjá pabba sínum í dag og síðan er það sveitin á föstudag. Frétti að heyskapur er hafinn mátulega daginn fyrir rigningu. Annars er fínt að fá smá regn en er samt að vona að það verði ekki mjög lengi og alls ekki lárétt. Það er fátt eins leiðinleg og lárétt regn. Hafrún fór gölluð í unglingavinnuna í morgun enda ekki gaman að vera óvarin í skólagörðunum í rigningu. Hún fer síðan að vinna í líkamsræktinni seinnipartinn. Gerði það líka í gær. Naddinn er bara í sinni vinnu í Reykjavíkinni og unir sér vel. Merkilegt hvað hann er orðinn stór, ja kannski ekki merkilegt drengurinn er orðinn fullorðinn 18 ára karlmaður.

Við erum að fara með Hugin til Lúthers í dag og fáum væntanlega fína skoðun og síðan er ætlunin að hann fari í Rjóður á morgun og verði þar yfir helgina. Þar sem allt gekk svona vel um daginn þá er ég frekar bjartsýn á að helgin komi til með að ganga upp og hann verði þar alla helgina án viðkomu á bráðadeildinni.

Ætla að hætta núna og skella Hugin í bað. Þangað til næst, elskið hvert annað.

unglingapíur óskast

Ég held að það sé nokkuð ljóst sem móðir 3. unglinga að ég fari ekki mikið að heiman og skilji þau eftir eftirlitslaus. Að minnsta kosti ekki eftir kvöldmat.

Verður núna farið að auglýsa eftir unglingapíum líkt og barnapíum til að passa á meðan foreldrarnir skreppa aðeins af bæ?

Móðirin hringdi sjálf í lögregluna

Hvað ef þetta er satt?

Hvað gerist ef þessar ásakanir eru sannar? Þarf Paris þá að sitja dóminn af sér aftur og þá jafnvel í öðru fangelsi með "vondum" fangelsisstjóra sem fer ekki í póstútburð?

Paris Hilton og fangelsið

Föstudagurinn 13. Ógurlega svakalega hræðilegur dagur ef...

Í dag er ógurlegur dagur. Að minnsta kosti í augum þeirra sem lifa eftir hjátrúnni. Það er Föstudagurinn 13. úúú. Mér finnst reyndar föstudagar ágætir dagar og sérstaklega þeir sem eru 13. dag mánaðarins, ég er reyndar ótrúlega óhjátrúarfull kona og hef óspart grín gert að þeim sem lifa eftir hjátrú í huga mér. Ok. stundum hugsa ég líka upphátt. Í dag hefjast Hundadagar og samkvæmt hjátrúnni ræðst veður sumarsins af veðrinu sem er í dag. Hér er glaða sólskin, hægur vindur og hlýtt. Ja svei mer þá ef ég velji ekki bara að trúa á þetta núna. Ég er ekkert ósátt við veðrið eins og það er í dag og hef ekkert á móti því að það verði svona út sumarið.  Ég ákvað að lesa stjörnuspána mína, í dag hún hljómar svo: "Þú er svo vinsæll að þér finnst þú ekki þurfa að ganga í augun á neinum. Leyfðu öðrum líka að tala og sýna hvað í þeim býr". Þetta er það flott stjörnuspá að ég er að hugsa um að trúa henni í dag. Það hentar ágætlega nema kannski að þurfa að þegja.  Það er sem sagt ljóst eftir skrif mín hér að ofan að ég er hentistefnumanneskja, amk. þegar hjátrú og stjörnuspá er um að ræða.

Guðjón minn er enn í sveitinni og unir vel. Honum datt í hug að taka þátt í Héraðsmóti í frjálsum íþróttum þrátt fyrir að hafa aldrei æft frjálsar nema auðvitað í leikfimi í skólanum. Guttinn fór, sá og sigraði. Hann tók þátt í 6 greinum og tók gull í 2 og silfur í öðrum 2 auk þess sem hann skilaði stigum í 1 grein og tókst að verða ekki síðastur í þeirri síðustu. Og ekki nóg með það heldur var hann einnig stigahæstur pilta á mótinu og fékk að launum dýrindis dollu og þátttökurétt á stærra móti sem verður haldið í ágúst. Hann ætti kannski að skella sér í að æfa frjálsar og stefna á að verða næsti Jón Arnar.

Ég er enn í iðnaðarmanns gírnum er pallinn varðar. Gerist lítið en gerist samt smá. Þá er ég svo sannarlega að tala um smá. Einn daginn er mokuð hola, næsta dag önnur hola svona gengur þetta koll af kolli. Ég er reyndar að gæla við þann draum að geta gert dálítið meira á dag en grafa eina holu á næstu dögum. Við erum nefnilega búin að fá konu sem ætlar að hjálpa okkur með Huginn og er upplagt á meðan aðlögun stendur að fara ekki lengra en hinu megin við vegginn og smíða pall. Ætla samt ekki að fullyrða neitt um hraða verksins en vona samt að hraðinn verði meiri en hraði snigilsins. Það hlýtur að verða þannig því eins og allir vita þá flytur trúin fjöll og er dagurinn í dag sérstaklega tilvalinn til að trúa. 

Nóg í bili. Þangað til næst elskið hvort annað þó þið komist ekki í Húsafell. (þar er fullt)

Ég er efni í iðnaðarmann

Sól sól skín á mig. Ég er farin að halda að hitabylgjan sem hefur verið í Danmörku síðast liðið ár sé komin til Íslands. Ekki að ég sé að kvarta heldur þvert á móti. Man varla eftir svona heitu og góðu sumri. Það er reyndar ekkert að marka að ég muni ekki hvernig síðasta sumar var eða þar síðasta og tala ekki um sumarið '94. Því ég er líkt og svo margir Íslendingar með mikið skammtíma minni á veður. Hver man ekki eftir því til dæmis þegar það var alltaf rigning á 17. júní alveg sama hvernig veðrið var í raun? Ég er alveg sannfærð um að það hafi oftar verið rigning á þeim merka degi en ekki. En í fyrra sá ég samantekt frá veðurstofunni sem sýnir að ég hef svo rangt fyrir mér því að "góðir" 17. júní voru mun fleiri en "slæmir" 17. júní veðurfarslega séð. Minnið er stundum að leika mann grátt.  Ég er alla vega sátt við þetta yndislega sumarveður sem yljar okkur þessa dagana og vona að það haldi áfram lengi enn.

Það hefur mikið verið talað um að iðnaðarmenn séu sérstakir og ekki auðfengnir. Þeir komi gjarnan til fólks þegar um er beðið og mæli og taki út verkið sem vinna þarf en sjáist síðan ekki fyrr en eftir dúk og disk og komi þá og geri smá og fari síðan aftur. Ég held að ég sé að verða svoleiðis. Að minnsta kosti þegar við tölum um pallinn. Það er lítið að gerast með hann en gerist samt alltaf eitthvað smá og ég sé því fram á að hann geti hugsanlega verið tilbúinn um Ljósanótt. En eins og einhver sagði "góðir hlutir gerast hægt" og verð ég því bara að trúa því þrátt fyrir að vera ekki þolinmóðasta manneskja í heimi.

Ætla að hætta núna. Þangað til næst elskið hvert annað.

Ísland tært og ómengað

Frábært að gefa svona gott fordæmi. Ísland er auglýst sem hreint og ómengað. Þetta er góð leið til að undirstrika hreinleikann og meðvitund okkar fyrir umhverfinu. Við förum vonandi að sjá aðra forsvarsmenn Íslenska ríkisins á tvinnbílum eða sambærilega lítið mengandi. ÁFRAM ÍSLAND!

Forsetaembættið fær nýjan bíl

enn helgi

Kominn enn einn föstudagurinn og vikan búin að líða í rólegheitum. Huginn er enn í Rjóðrinu og gengur vel. Við förum í dag og sækjum hann. Mikið verður gott að fá hann heim aftur ég er búin að sakna hans helling. Annars gengur allt sinn vanagang hérna. Ásdís á fullu í boltanum, er að æfa með strákunum en fer og spilar leik í dag með stelpunum. Voða spennandi.

Við fórum upp á Skaga á miðvikudaginn til að sjá fótboltaleik milli ÍA og Keflavíkur og ég þarf ekkert að ræða meir um þann leik því ég held að allflestir Íslendingar hafi fengið vitneskju um hvað gekk á þar. Fórum líka í heimsókn til Péturs og Ríkeyjar. Undanfarin ár þá hef ég sagt þeim að ég ætli að koma á leikinn en aldrei farið fyrr en núna þannig að ég passaði mig á því að láta þau ekki vita fyrr en það væri pottþétt að ég myndi komast. Finnst svo leiðinlegt að segjast ætla að koma og koma svo ekki. Alltaf gaman að koma til þeirra, takk fyrir okkur.

Var að fatta svolítið í morgun. Ég hef aldrei skrifað dagbók og hef í raun aldrei ætlað það. Síðan áttaði ég mig á því að þetta blogg mitt er dagbók, þannig að ég held dagbók án þess þó að hafa ætlað það. Fyndið hvernig maður platar sjálfan sig.

Loksins kom rigning og ættu bændur því að fagna og láta af regndansi sínum. Síðan fara bændur líklega að bölva regninu því hey liggur flatt á túnum og það skemmist því það er ekki hægt að hirða það. Það var svo sem kominn tími til að rigna því allt var að skrælna og mikil hætta á sinubrunum út um allt land. Ekki spennandi að lenda í öðrum svona "Mýrabruna" eins og var í fyrra eða árið þar áður. Gríðarleg mengun, hætta og umhverfisspjöll. Þó svo að afleiðingarnar kæmu vísindamönnum á óvart. Það er ekki víst að þær yrðu sambærilegar annars staðar. Hrikalega erfitt að gera fólki til geðs. Ég reyndar skil fólk vel sem er núna í útilegu, fátt eins ömurlegt eins og blaut tjöld. Vona samt að allir skemmti sér vel á Landsmóti, N1 móti og á Írskum dögum. Þar er reyndar skjálfti í mönnum fyrst SMS skilaboðin virkuðu ekki um síðustu helgi en virka vel núna. Finnst reyndar frekar leiðinleg og ósanngjarnt að setja alla unglinga undir sama hatt og segja þau óalandi og óferjandi. Það er ekki nema brot af krökkunum sem haga sér óásættanlega og skemma allt fyrir hinum. Vissulega hafa þessir krakkar hátt og þurfa ekki að sofa eins mikið og eldra fólk en það þarf ekki að skíta alla krakkana út fyrir það.

Hætt í bili. Þangað til næst elskið hvort annað og líka unglingana.